Vamos a MERCAR con un bloggercuentu....

Rufino y el so fíu Xurde van xuntos güei a facer los recaos.

-Mi má tien que trabayar tol día y nun tenemos munchu tiempu-

Diz-y Xurde a su pá baxando les escaleres con una notina pa que nun se-yos escaezca ninguna cosa.

Y tiran barriu alantre con un carrín coloráu pa nun puxar poles bolses.

Al primer sitiu que lleguen, hai un arume fuerte que yá güel dende la esquina de la cai, onde ta Carme, vistía de blanco y verde escuro con botes d'agua.

- Pá, nun m'alcuerdo como se llama esi comerciu ¿sábeslo tú? -

- ¡Home fíu, mira a ver, oh! -

Podeis ayudalu vosotros y vosotres ¿non?

https://drive.google.com/file/d/0ByXggn4BOpCdZUxILXFtNmxld28/edit?usp=sharing

Equí vienden....¿sabéislo?

Pescáu y mariscu

Entren a la pescadería, que nun tien cristalera nenguna nin puerta y Carme, saluda al altu la lleva, como siempre:

- Mui buenes, vaya día guapu que tenemos güei ...,¿qué va ser? -

- Bonos díes, Carme- diz Rufino,

- pues quería unes parrochines y dos llilnguaos pa detrás de les lenteyes-

Pide Rufino, mirando pa estos cartelos:

El neñu queda ablucáu tamién mirando pa los cartelos qu'hai na paré y un poco enfociácu porque les lenteyes nun-y gusten pero ná de ná.

- Ta llueu Carme, que pases un bon día -

Despídese Rufino pa siguir colos recaos saliendo pa la cera.
- Esta muyer madruga muncho pa dir a la rula a pol pescáu fresco- añade mentanto esperan a qu'el semáforu se ponga en verde pa cruciar la cai.

Al pie de la PESCADERÍA lleguan a un sitiu que-y gusta a Xurde enforma. Ellí güel mui bien y como ye mui, pero que mui LLAMBIÓN...

¿Vosotres y vosotros sois llambiones?

- Xulian, ¡qué pinta tien too, amigu!- Diz Rufino, afamiáu...

Xulián ye'l señor que viende...

¡Vaya escaecióseme otra vuelta, "cachis la mar"!

- ¿Lo de siempre? - entruga'l panaderu con voz melguera

- Si, si namás - Contésta-y Rufino que ta clisáu y más sollerte a le tartes de milenta colorinos que se ven na xelerona grandona de lo fondero.

Rufino y Xurde colan d'allí rellambiéndose.

Como pa non, mirái que rico tien que tar too esto:

Pan, empanaes, bollos preñaos y llabionaes

A Xurde nun lu dexen baxar solu a pol pan, porque siempre llega'l mediu a casa mordigañáu y a la metá, y ye que cuando'l pan ta calentíno y recien sacao del fornu nun hai quien s'aguante

¿Pásavos los mesmo?

Siguen cola xera de los recaos per debaxo los árboles pa escapar del sol.

-Ta bien, fíu, yá queda poco. Mira esti comerciu ye nuevu, abriéronlu la selmana pasada, equí tienen...- Bono, nun-y diz ná a Xurde porque m'imaxino que lo sabe.

-Si pá, ¿como nun lo vaoi saber?...Amás nel colexu díz el profe que polo menos tenemos que comer cinco al día namás y ná menos -

¿Sabéislo? ¿Qué ye lo que vienden?

Entren pa dientro.
-Bonos díes - Saluda'l fruteru sorriente.
-Mui buenes; ¡qué guapu y que fruta más bueno tienes!-

Diz Rufino mriándolo les naranxes y los piescos.
-Vas poneme...mediu kilo de.....y un kilo de........-
Y queda pensatible, duldando...

Vamos echa-y un gabitu. A ver que frutes y verdures podemos recomenda-y a Rufino y Xurde:

Frutes

Verdures

Depués de ver la frutería nueva, que tamién cuenta con unos cartelos perguapos, entaínen darreú a ver a Celsa.

Ellí siempre hai muncha xente....¡claro, ye roxa, asturiana de los valles!

¿Qué pue sey roxa asturiana de los valles?

Carne

Embutíos

-¡Pá mira!- fala seliquino Xurde.

-Nesti comerciu tamién hai estos cartelos-

Comenta el neñu mirándo pa ellos muertu risa pola semeya del gochu y el xatu.

Pues tóca-yos esperan un buen cachu, hasta que por fín despachan naquel bulliciu de xente, que nun dexan d'entrar y salir...ye alloriante.
De camín pa casa, pasan a saludar a Fina, la de la tiendina de tola vida del barriu

Fina viende de de too un poco y siempre tien dalgo interesante y nuevo.

Vamos ver una parte de lo que tien ente les estanteríes Fina:

Caundo tán ente la tiendina, salúdenla al empar
-¡Finaasaa!-
-¡Cómo va esa mañana!, ¿Munchu trabayu?- entrúga-y Rufiho
-Nun me pueo quexar, toi con unos encargos que van venir a recoyer agora- diz-y apurada
Ente caxes, asoma la cabeza y da-yos una bolsina.
-Toma neñu, pal postre-

¿Qué-y regala?

-¡Oh, un flanín!. Munchísimes Gracies-

Glaya Xurde percontentu.
-Fina, nun pues ser, tas tol día dando-y caxigalines al guah.e-

Alderica Rudino coloráu por nun haber mercao nada ellí
-Calla y tira p'allá.-

Retrúca-y ella gayolera
A Xurde, presta pola vida pasar perende, porque esiempre-y regala llambionaes.
Rufino y Xurde, tiraron pa casa pa dir faciendo la xinta.

-Mercar presta muncho-

Queda pensativu y entrúga-y a su pá

-¿Por qué en munchos comericos teienen esos cartelinos n'asturianu?-

-Pues mira fíu, ye pa que aprenda a pidilo na nuestra llingua, por si nun lo sabes. Asina que envede pidir Rape, na pescadería hai que pidir pixín, etc...-

Esplíca-y Rufino encatáu y añade

-Claro fíu, a los tenderos y tenderes gústayos falar y que-yos falen n'asturianu-

Contesta Rufino.

-Además, si vas a facer los recaos, pues apuntalos nesti tacu...-

que podeis baxar equí calcando na imaxe

-...pa que nun vos queden nel cantu la memoria....Y que nun vos dea vergoña pidir les coses n'asturianu-

Termina falando Xurde tou gayasperu

-ENTÓS, UN POLLO NON, UN PITU POR FAVOR y si ye de caleya meyor-